כֹּה-אָמַר
אֲדֹנָי יְהוִה,
הִנֵּה אֶשָּׂא
אֶל-גּוֹיִם
יָדִי,
וְאֶל-עַמִּים, אָרִים
נִסִּי;
וְהֵבִיאוּ
בָנַיִךְ
בְּחֹצֶן,
וּבְנֹתַיִךְ עַל-כָּתֵף תִּנָּשֶׂאנָה.
וְהָיוּ
מְלָכִים
אֹמְנַיִךְ,
וְשָׂרוֹתֵיהֶם
מֵינִיקֹתַיִךְ—
אַפַּיִם אֶרֶץ יִשְׁתַּחֲווּ
לָךְ,
וַעֲפַר רַגְלַיִךְ יְלַחֵכוּ;
וְיָדַעַתְּ
כִּי-אֲנִי יְהוָה,
אֲשֶׁר לֹא-יֵבֹשׁוּ
קֹוָי.

הֲיֻקַּח
מִגִּבּוֹר,
מַלְקוֹחַ;
וְאִם-שְׁבִי צַדִּיק, יִמָּלֵט.

כִּי-כֹה אָמַר
יְהוָה,
גַּם-שְׁבִי גִבּוֹר יֻקָּח,
וּמַלְקוֹחַ עָרִיץ, יִמָּלֵט;
וְאֶת-יְרִיבֵךְ אָנֹכִי אָרִיב,
וְאֶת-בָּנַיִךְ אָנֹכִי אוֹשִׁיעַ.
וְהַאֲכַלְתִּי
אֶת-מוֹנַיִךְ
אֶת-בְּשָׂרָם,
וְכֶעָסִיס דָּמָם יִשְׁכָּרוּן;
וְיָדְעוּ
כָל-בָּשָׂר,
כִּי אֲנִי יְהוָה
מוֹשִׁיעֵךְ,
וְגֹאֲלֵךְ,
אֲבִיר יַעֲקֹב.

כֹּה אָמַר
יְהוָה,
אֵי זֶה
סֵפֶר כְּרִיתוּת
אִמְּכֶם
אֲשֶׁר שִׁלַּחְתִּיהָ,
אוֹ מִי
מִנּוֹשַׁי,
אֲשֶׁר-מָכַרְתִּי
אֶתְכֶם
לוֹ;
הֵן בַּעֲוֺנֹתֵיכֶם נִמְכַּרְתֶּם,
וּבְפִשְׁעֵיכֶם שֻׁלְּחָה
אִמְּכֶם.
מַדּוּעַ בָּאתִי
וְאֵין אִישׁ,
קָרָאתִי
וְאֵין עוֹנֶה—
הֲקָצוֹר קָצְרָה
יָדִי מִפְּדוּת,
וְאִם-אֵין-בִּי כֹחַ
לְהַצִּיל;
הֵן בְּגַעֲרָתִי אַחֲרִיב
יָם,
אָשִׂים
נְהָרוֹת
מִדְבָּר,
תִּבְאַשׁ
דְּגָתָם
מֵאֵין מַיִם,
וְתָמֹת
בַּצָּמָא.
אַלְבִּישׁ
שָׁמַיִם,
קַדְרוּת;
וְשַׂק, אָשִׂים
כְּסוּתָם.